Televizionet
Radiot
Shtypi i shkruar
Sateliti
Downloads
Albforumi
Media POLL

Fitues i ri me gabime të vjetra

Deri në ditën e sotme të këtij kalendari elektoral, duket se jemi të përcaktuar në fatin tonë qeverisës, përmes profecisë reale: Do të kemi një qeverisës të ri që pandreqshmërisht mbart gabime të vjetra. Nuk kam parasysh, vijimin e qeverisjes socialiste, por edhe ardhjen e demokratëve. Jemi lodhur me socialistët dhe zhgënjyer për shumëçka, por kemi ende skepticizëm për demokratët që vuajnë dyshimin e ndryshimit në opozitë. Dy formacionet në protagonizëm politik, po “udhëtojnë” drejt turit zgjedhor me dilemën e fitimit të besimit: “se janë ndryshe nga njeri-tjetri”. Pra, kanë rënë në pozitën e narcizimit me vetveten dhe e kontrastit po me vetveten. Ky është sistemi i referencës që kanë ngritur për veten dhe këtë duan të imponojnë për elektoratin shqiptar. Nën këtë filozofi po ngrenë edhe strategjinë e konkurimit në turin e ri elektoral. Ndërkohë që ne, mesa duket, pandryshueshmërisht mbetemi vetëm në gjasën për të zgjedhur për qeverisje njërën prej të dyjave. Të dyja palët e vjetra, në prolog të kësaj fushate, kanë shfaqur ngutjen e përdorimit të skuadrave të të rinjve me spimpati. Ndërsa PD-ja zgjodhi një gjetje kuptimplote me promovimin e KOP-it, PS-ja i mëshoi metodologjikisht frymës forumse të ftesave për debate, tryeza dhe shkëmbime me intelektualë të rinj dhe teknicienë të investuar në sfera dhe fusha të ndryshme. Pra, të dyja forcat imituan njera-tjetrën nën kompleksin e mosrënies në plagjiaturë. Mirëpo në këtë praktikë fillestare, në këtë aplikim të parë elektoral, është lehtësisht e lexueshme thellësia e cekët e sinqeritetit institucional të dy partive të vjetra. I konsiderojmë parti të vjetra, ndoshta pa të drejtë, pasi po të merret në konsideratë historia politike e partitizmit politik në Europë, dhe, pse jo edhe në rajonin tonë, të vjetra nuk quhen ende disa parti 40 vjeçare. Mirëpo mesa duket, hija e kryetarëve, qenka bërë iluzionisht edhe shtat moshor për partitë tona! Vjetërimi në rastin konkret lidhet me reflektimin e pakryer. PD për atë të qeverisjes së shkuar dhe PS për atë të qeverisjes së tanishme. Koha elektorale e mbetur as që mund të jetë rast i sinqeritetit. Socialistët edhe pse duhet të jenë kryekëput më të kujdesshëm në pretendimin e tyre, vijojnë të gabojnë pandreqshmërisht së paku në disa kandidime. Nëse i hedh një sy listës paraprake të kandidatëve të tyre, gjen shembullin unikal të kandidimit të disa emrave të cilët kanë lidhje të drejtpërdrejtë interesash, kanë një histori korrupsioni dhe një “odise” të pashëmbëllt akuzash, janë të pabesueshëm në transparencën e tyre financiare dhe më së shumti të pabesueshëm për deklarimin e tyre pasuror. Unë nuk di ndonjë rast nga përvoja elektorale e kësaj Europe ku jetojmë, të kandidojë për deputet kryedoganieri në detyrë! Këtë kosto të konkurimit të të pasinqertëve dhe pasurifshehësve, PS duhet ta llogarisë sa s’është vonë. Përkundër kësaj zgjedhjeje PD, ka një të drejtë krenimi dhe një notë të merituar. Selektimi prej saj i disa emrave të rinj, nuk “bie erë” së paku deri tani. Dhe kjo është një premisë besimi. Mirëpo, duke besuar atë shprehjen e avokat Ngjelës ditën e promovimit të KOP-it se:” Këta janë zëvendësministra e poshtë, ministrat janë përballë”, jam i detyruar të besoj se edhe demokratët po afrojnë kabinetin e ri të të vjetërve, ose në mos nominalisht kështu, së paku kryesimin e vjetër të qeverisësve të rinj. Përballë këtyre alternativave më të mundshme, dy konkurentët që administrojnë fitore kanë padyshim shansin të deklarojnë formulat dhe zgjidhjet e aplikueshme për të dalë nga ky ngërç ku vetkanërënë. Mendoj se këtu qëndron edhe çelësi se si mund të dominojnë njeri mbi tjetrin, në përballjen elektorale të nisur, këtu mendoj unë, qëndron edhe mundësia për ndryshimin e “anatomisë” së organizmit të trashëguar zgjedhor.